我的故事 (四)

 花旗（ 我住這邊 ）四季分明,現在正值深秋,樹木落葉得七八八,和初秋時的金黄色,棗紅色,退綠色等山景比起來,就恰似一幅織錦（初秋）和舊花布（深秋）ｏ

我期望着初雪的到來,那棉絮般的雪花,悠然的,輕輕的飄下來,我喜歡張開雙掌去接着,好有詩意美景ｏ

實際情况是 - 天氣凍到人們非必要都吳出門,所有主要車道都灑了鹽,小路上的雪受了壓,成為一片滑面,想停車有時很困難,若然是斜坡更停不了,撞車幾乎避免不了,好危險架ｏ

室外內温差超過華氏三十度,好在全屋有暖氣 （租金是包水及天然氣）,連浴室都有ｏ

可以打麻雀 ?

打你個頭,打烏鴉就有百幾隻你打,三十六年來第一次五個幾月冇雀局,哈哈ｏ

繼續講那虛構的故事ｏ

第二章 - 警校生涯 （ 鬼古, 教官 ）

在學堂的都是後生仔居多,真是來自五湖四海,有好似我咁想做個好警察,也有因為冇セ野好做而當差,更有些有社團背景嚟當差,方便佢地行走,我班有個前小販管理隊老散,在隔離房有嗰離咗婚意氣低沉而考警察ｏ

大家課餘特別喺晚上得閒就喺Canteen或宿舍吹牛講故,有時真喺吹水吳抹嘴ｏ講鬼古就喺其中一樣鐘意講嘅嘢ｏ我記得其中三個故事 :

第一個 - 警校前身在日本仔打香港時喺一個亂葬崗,所以很猛鬼,晚上啲鬼在宿舍行來行去,那些皮靴聲半夜在房間都聽到ｏ

第二個 - 在第二靶塲個井有一年有個失戀師姐跳咗落去自殺,所以半夜當更的師兄有啲話聽到有女人喊聲ｏ

第三個 - 話有一次在散彈鎗練靶時,一名學警見冇阿sir喺度就舉起枝鎗玩見冇子彈就同另一師兄講 : 信吳信我一鎗打x死你吖嗱ｏ那師兄明知未有上子彈便講 : 吳信! 咁嗰個拿鎗師兄就板製心想最多click一聲,點知喺 ' 砰 ' 一聲,對方中彈倒地身亡!

全部都喺鑒嘢 ! 等我嚟話你知點解全部假嘅 -

第一個 - 華富邨喺亂葬岡就聽過,有機會再講ｏ啲師兄話半夜聽到日本皇軍在房內行來行去我都親身聽到ｏ

有一晚,半夜就聽到,真是嘎嘎聲在房內行來行去,甚至行到我牀邊 ! 我當時合埋眼,心想,吳喺咁猛喺嗎,我時運真是咁低 !再想想,超,警校咁重皇氣,怕乜,何况成房都是人ｏ我同自己講,吳驚,我喺鬼節出世嘅,便一個突然坐起身,look 大對眼週圍望,超,正式鬼影都冇隻ｏ但啲嘎嘎聲依然,車,原來啲師兄們日間操勞又冇湯水,有人在睡覺時磨牙 ,隔離牀嗰肥師兄最犀利,吳怪之得好似行埋我身邊啦, 重俾佢嚇咗幾晚,哼 !

第二個 - 第二靶場都冇井,當多次晚更祗聽到蟋蟀啲 '蟀蟀' 聲,啲人就當女人哭聲ｏ

第三個 - 真喺吳識警校啲人就會俾佢呃到ｏ因為在警校,任何鎗械射擊訓練都至少有二位阿sir在場,上彈要聽order做,更不會讓學警在任何情况下拿有槍械而冇教官在場ｏ

所以全部鬼故事都喺假嘅ｏ嘻,做咗 ghost buster 添ｏ

講吓啲教官吖,幫辦負責教'文',e.g. 警察通例 ( Police General Orders - PGO ),及法例等堂課ｏ而沙展就教 ' 武 ',e.g. 步操,太耐啦,吳記得咁詳細ｏ

另外有PTI ( Physical Training Instructor ),都是一班署理沙展,重有靶場主任,是沙展級,佢好嚴肅,從來冇笑容,但我覺得佢慈祥,鎗彈是好危險,佢是需要認嚴肅ｏ

有位負責步操嘅教官,post 好似叫CDM ( Chief Drill Master ) 是軍部借過嚟,佢在軍部是Sergeant Major,即是警察部嘅'咩喳' (即現時的警署警長）,但過到嚟是總督察 ! 佢好專業,號令聲雄壯非常,我好鐘意聽佢叫操ｏ每早概morning parade 多由佢發號令ｏ

黎幫辦及杜沙展都喺第一次教班,二人都很用心,吳想第一次就衰俾人睇,特別喺沙展杜ｏ

黎sir同沙展心地吳錯,成日同我地講而家社會進步咗,當差吳同以前,樣樣嘢要揸正嚟做ｏ所以我話佢心地幾好ｏ

杜沙展心理負担大啲ｏ因為那時代冇咁後生嘅三柴（沙展,警長）,頂多二柴（警目）有啲人吳抵得佢ｏ所以佢教步操教到聲沙曬,晚晚要飲花旗參ｏ佢有次同我地講 : 收x要收大餅,銀紙有冧把跟ｏ吳好收回頭xｏ心地都算好好ｏ佢都有提我地社會在進步,做野要揸正嚟做ｏ

二位阿sir都語重心長,但其實那時代重未能全部都揸正嚟做,以後講落去你地就知,好在現今可以了ｏ

我估當時警察部最廉潔嘅部門就喺警校ｏ就我所知,沒有任何教官揾學警着數ｏ以我嗰班為例,二位教官從不攞我地一仙一毫嘅利益,祗出席了我們一次晚飯,是結業後的謝師宴ｏ

其實那些正教官好多都斯文,副教官也有好樣,特別有二位肥沙展,同我地沙展一樣,似番個人囉,吳同那些作威作福扮曬野ｏ

有一次畢業前步操比賽,由反貪污部幫辦嚟叫操（ 因為太多年了,我可能將二次步操當一次講,算啦,反正都是虛構故事ｏ）也是考核佢步操,聽講喺升官其中一條件ｏ

沙展同我地講,細佬,認x住呢條老幫,佢喺棺材鋪（那時叫反貪污部做棺材鋪,在此鋪頭的人及在政治部的人是吳會同其他伙記來往ｏ）嚟嘅,認x實佢呀ｏ

大長氣了,下次再講 

 我的故事 - 續 (2)

網誌分類：未分類網誌日期：2010-05-30 20:04

這些故事都是數年前退休開始寫的；現在停了。都有多篇存貨，如果有翻的寫作衝動，也許會續寫多些。謝謝。

13 Nov. 2006

 好,開罐啤酒先,亞,有隻啤酒 ( lager ) 叫 Samuel Adam's,好好飲,試吓啦ｏ

如果太長氣就話我知等我cut短啲ｏ