血染的風采

血染的風采 - 雀林反擊戰

2012年5月16日上午8:21公開累積瀏覽 26010

 

昨日去沙田打回港後第二場麻雀 .

上一場飛機浪都未暈完就披甲上陣 , 結果旗開不勝 , 流出第一滴血 :(  而家 , 二日後實行屢敗屢戰 , 再次孤身走我路 .

風蕭蕭兮易輸寒 , 同太太在暈陀陀邨各行各路 , 佢去買電飯煲 . 我就去搭火車出沙田 .

香港的火車幾時都咁多人 , 但好整潔 .

為咗吳遲到 , 我一般赴約都早的出發 , 今日早咗啲就行一陣新城市廣場 . 人頭湧湧 , 同美國我住那區的商場靜靜的差天共地 .

經過超市便入去睇吓 . 榴蓮好香 , 回港都未夠一星期已經買咗三次食 . 其它一些貨品也比美國平得多 .

卒之行到酒樓 , 第一個到 , 還有些時間及因為未吃午飯便叫了碟燒肉飯同一枝青島啤酒 . 見到碟芥棘醬就吳多likely , 打麻雀數到三棘 , 點可以芥棘 :)

人齊開枱 .

都未到西圈已經輸咗約五底 (500) , 班友仔笑我再接再勵派錢 . 我同佢地講 , 我西圈發火 , 非同小可 !

果然俾我講中 , 手風轉順 , 靚牌不斷 , 到晚飯後更一鋪自摸十三么十番 , 連埋Jackpot累積嘅七百幾 , 呢鋪贏咗約十五底 (1500) 有多 . ( Jackpot - 每逢打和一鋪就每家放十元入Jackpot , 誰人糊出自摸十番三棘就可取得 Jackpot , 但糊人家打出的牌吃十番不能得 Jackpot , 所以我叫糊時好驚佢地出牌我糊 )

跟住都上多落少 , 可惜晚節有啲不保 , 包咗三鋪八番 . 否則上場輸的二十底就可回鄉 .

結果 ?

望鄉囉 , 羸咗十九底  :) !

( 亞虎吳知攪乜鬼 , 冇法子放照片  )

檢舉這篇POST